Mar 25, 2017
LAKAD ni Cogal Cristopher
Samahan mo akong maglakad,
'wag kang mag-alala
Hindi tayo maliligaw
Humawak ka sa aking kamay
Tayo ay maglalakbay
Hanggang ang mga paa ay mangalay.
Samahan mo akong maglakad,
'wag kang mag-alala
Kung saanman tayo mapadpad
Kung saanman tayo dalhin ng tsinelas na pudpod
Ng binting hindi napapagod.
Samahan mo akong maglakad,
'wag kang mag-alala
Kung sakaling dumilim na ang paligid
Dahil gagabayan tayo ng liwanag,
Liwanag ng ating pag-ibig.
Samahan mo akong maglakad,
'wag kang mag-alala
Hindi kita pababayaan
At lalong hindi kita iiwang mag-isa sa daan.
Sabay tayong humakbang
Dahan-dahan, paisa-isa
Unti-unti tayong lumalayo sa linya kung saan tayo nag-umpisa
Dahan-dahan, paisa-isa
Unti-unti naman tayong nagiging malapit sa isa't isa.
Dahan-dahan, Paisa-isa
Ganiyan lang
'wag tayong magmamadali
Upang hindi tayo magkamali
At kung sakaliman
Na matinik
Mababaw lang ang sugat
Hindi mahapdi at 'di rin gaanong masakit.
Kung ikaw ay mapagod pwede tayong magpahinga
Basta hindi pwedeng lumiko sa kanan
At lalong hindi pwedeng kumaliwa.
At sa tagal ng ating paglalakad
Malayo ang ating narating
Marami rin ang ating pinagdaan
Kaya kung nagsasawa ka na
Pwede naman tayong huminto sandali
Lumingon sa likod at pagmasdan ang mga ala-ala.
Kung nakalimutan mo na ang 'ngiti'
Pwede nating balikan kung sakali
At isuot muli sa labi.
No comments:
Post a Comment